Soinu identitatea
Duela gutxi supermerkatu kate ezagun bateko marketin arduradun batekin bildu ginen beren irudiaren berritze prozesua amaitu berritan. Identitate grafikoarekin batera entzuten zen musika, sintonia, galdu egin zutela azaldu zigun. Rebrandina egitean, marka errekonozimenduan pisu handia duen geruza bat sakrifikatu zutela, alegia.
Marka eta proiektuek bezeroekin hitz egiten, erantzuten, eztabaidatzen edota txantxak egiten dituzten garaian, ikusentzunezko edukiek inguratuta bizi garen honetan, audio branding edo sonic branding-ak berebiziko garrantzia hartu du. Zure marka nola entzuten den; zer balio, zer tonu eta sentimendu transmititzen dituen erabakitzea, zure logoaren koloreak eta formak erabakitzea bezain garrantzitsua da.
‘The year of the ear’
Alexander Coggin’s artistaren baimenarekin, pandemia atzean utzi zuen 2021. urtea ‘The year of the ear’ (belarriaren urtea) bezala definitu zuten aditu askok. Baina esan dezakegu, 2014an AEBtan podcasten booma gertatu eta Europan 2018/2019an erreplika izan zuenetik gaur arte, industria berri baten ernamuintzea gertatzen ari dela audioaren inguruan. Audioliburuak, soinu fikzioak eta askotariko podcastak alde batetik, eta audio espazialaren edo murgiltzailearen kontsolidazioari, bozgorailu adimentsuen eta ahots laguntzaileen ugaltzea gehitu behar diegu. Audio brandina funtsezko alorra bihurtu da zure proiektuaren identitatea definitzeko prozesuan.
Soinua sentimenduen sorburu
Modu oso sinboliko eta sakon batean transmititzen dira balio, mezu eta istorioak soinuaren bitartez. Literaturarekin ezaugarriak partekatzen ditu audioak, espazio eta unibertsoak iradokitzerakoan. Eleberri batean irakurleekin gertatzen den bezala, audioan ere istorioko pertsonaiak eta lekuak imagintzeko prozesuan ezinbesteko partaide bihurtzen da entzulea. Audioan entzulea da puzzle narratiboa amaitzen duen zuzendaria. Irudimena beti da irudi esplizitua baino askoz ere boteretsuagoa. Beste modu batera esanda, entzulea sormen prozesuaren azken katebegiko partaide egiteak, izugarrizko indarra ematen die soinuaren bidez egiten diren komunikazio prozesuei.
Netflixen ‘Ta dum’
Netflixen ‘Ta dum’ ezaguna da ondo landu eta diseinatutako soinu identitatearen adibide bat. Streaming plataformaren erabiltzaile orok instant batean ezagutuko duen doinua. Lon Benderrek -‘Braveheart’ filmagatik 1995ean soinu efektu onenen oscarra irabazi zuen konpositoreak- diseinatu zuen «kolpea».
Bai, Netflixen audiologoa adibide arrakastatsu bat da. Baina zinema aretoetan emititzen hasi zirenean konturatu ziren «kolpea» laburregia zela pantaila handirako. Eta Hans Zimmerri egin zioten moldaketa egiteko enkargua. Hona emaitza:
Tira, itzul gaitezen berriz artikuluaren hasieran aipatu dugun supermerkatu katearen kasura.
Markaren errelatoa, balioak eta identitatea definitzerako (edo transmititzerako) orduan, testu honi izenburua jartzen dion galdera ez da hutsala. Zure marka nola entzungo den definitzea oso serio hartu beharreko lana da. Ez da audiologoa diseinatzea edo enpresaren izenari ahotsa jartzea soilik. Markaren unibertsoa kontatzeko erabiliko dugun partitura zehaztea da. Hala eduki motzetan, nola komunikazio luzeagoetan. Funtsean, supermerkatu kate bat nola entzun behar den zehaztea, dendetako korridoreetan zer musika entzungo den erabakitzea ere bada. Zer sintoniak jantziko dituen ikusentzunezko edukiak. Eta zer ahotsek -gazte, zahar, emakume, gizon- parte hartuko duten komunikazio prozesuetan.
ULU Media -an (eta ULU Studios -en) soinu identitatea lantzen dihardugu hainbat proiektutan. 2024rako erronka gisa jarri dugu soinu brandinean sakontzea, soinu diseinuan eta askotariko audio proiektuetan ikasi duguna aplikatuz. Publizitate agentziekin elkarlanean ari gara eta markekin orpoz-orpo diseinu prozesuak egiten. Beti ditxosozko galderari erantzuna topatu nahian: Zure marka nola entzuten da?
